പ്രദീപിനും പണി കിട്ടി, ഡ്യൂഡിൽ നിന്ന് ഇളയരാജയുടെ രണ്ട് പാട്ടുകളും നീക്കം ചെയ്യണം;ഉത്തരവിട്ട് മദ്രാസ് ഹൈക്കോടതി

മാറ്റങ്ങൾ വരുത്തി വികൃതമാക്കിയാണ് പാട്ടുകൾ സിനിമയിൽ ഉപയോഗിച്ചതെന്ന ഇളയരാജയുടെ വാദം ശരിവെച്ചാണ് കോടതി ഇടക്കാല ഉത്തരവ് പുറപ്പെടുവിച്ചത്

പ്രദീപ് രംഗനാഥൻ ചിത്രം ഡ്യൂഡിൽ നിന്ന് ഇളയരാജയുടെ രണ്ട് പാട്ടുകളും നീക്കംചെയ്യാൻ മദ്രാസ് ഹൈക്കോടതി വെള്ളിയാഴ്ച ഉത്തരവിട്ടു. തന്റെ അനുമതികൂടാതെ പാട്ടുകൾ ഉപയോഗിച്ചത് പകർപ്പവകാശ ലംഘനമാണെന്ന് കാണിച്ച് ഇളയരാജ നൽകിയ ഹർജിയിലാണ് ജസ്റ്റിസ് എൻ സെന്തിൽകുമാറിന്റെ ഇടക്കാലവിധി.

1991 ൽ ഭാരതിരാജയുടെ സംവിധാനത്തിൽ ഇറങ്ങിയ ചിത്രമായ 'പുതു നെല്ലു പുതു നാത്തു' എന്ന ചിത്രത്തിലെ കറുത്ത മച്ചാ, പണക്കാരനിലെ ‘നൂറു വറുഷം ഇന്ത മാപ്പിളയ്ക്ക്’ എന്ന രണ്ട് ഗാനങ്ങളാണ് ഡ്യൂഡിൽ ഉപയോഗിച്ചിരിക്കുന്നത്. മാറ്റങ്ങൾ വരുത്തി വികൃതമാക്കിയാണ് പാട്ടുകൾ സിനിമയിൽ ഉപയോഗിച്ചതെന്ന ഇളയരാജയുടെ വാദം ശരിവെച്ചാണ് കോടതി ഇടക്കാല ഉത്തരവ് പുറപ്പെടുവിച്ചത്. ജനുവരി ഏഴിന് ഹർജിയിൽ വാദം തുടരും.

After Removing Karutha Machan Song 🤣🤣🤣🤣😭😭#Dudepic.twitter.com/mt52CtQXnA

പഴയ ഗാനങ്ങൾ വർഷങ്ങൾക്കുശേഷം വീണ്ടും സിനിമയിൽ ഉപയോഗിക്കുമ്പോൾ അവ കൂടുതൽ ജനകീയമാവുകയല്ലേ ചെയ്യുകയെന്ന് വാദത്തിനിടെ ഹൈക്കോടതി ഇളയരാജയോട് ആരാഞ്ഞിരുന്നു. പഴയ പാട്ടുകൾ പുതുരൂപത്തിൽ അവതരിപ്പിക്കുന്നത് എങ്ങനെയാണ് ഇളയരാജയെ ബാധിക്കുകയെന്ന സംശയവും കോടതി പ്രകടിപ്പിച്ചിരുന്നു. എന്നാൽ, മാറ്റങ്ങൾ വരുത്തിയതോടെ തന്റെ പാട്ടുകളുടെ ആത്മാവ് നഷ്ടമായെന്ന ഇളയരാജയുടെ പരാതി ന്യായമാണെന്ന് ബോധ്യം വന്നതായി കോടതി വെള്ളിയാഴ്ച പറഞ്ഞു.

നേരത്തെയും തന്റെ പാട്ടുകൾ ഇത്തരത്തിൽ സിനിമകളിൽ ഉൾപ്പെടുത്തിയെന്ന് കാണിച്ച് ഇളയരാജ കോടതിയെ സമീപിച്ചിരുന്നു. ‘ഗുഡ് ബാഡ് അഗ്ലി’ എന്ന സിനിമയിൽ ഇളയരാജ സംഗീതം നൽകിയ മൂന്ന് പഴയഗാനങ്ങളോടെ പ്രദർശിപ്പിക്കുന്നതും വിതരണം ചെയ്യുന്നതും വിൽക്കുന്നതും മദ്രാസ് ഹൈക്കോടതി നേരത്തേ ഇടക്കാല ഉത്തരവിലൂടെ തടഞ്ഞിരുന്നു. ഇതേത്തുടർന്ന് സിനിമ ഒടിടി പ്ലാറ്റ്‌ഫോമുകളിൽനിന്ന് പിൻവലിക്കേണ്ടിവന്നു. അഞ്ച് കോടി രൂപ നഷ്ടപരിഹാരം വേണമെന്നും ഇളയരാജ ആവശ്യപ്പെട്ടിരുന്നു. എന്നാൽ ഗാനത്തിന്റെ പകർപ്പവകാശം കൈവശം വെച്ചിരിക്കുന്നവരിൽ നിന്ന് അനുമതി വാങ്ങിയിട്ടുണ്ടെന്നായിരുന്നു സിനിമയുടെ നിർമാതാക്കളായ മൈത്രി മൂവി മേക്കേഴ്സിന്റെ വാദം.

Content Highlights: Both Ilayaraja songs should be removed from Dude orders highcourt

To advertise here,contact us